流落街頭

我來之前上網只能夠訂１晚住宿重要係６人房 mixed 添，全部都 Full 都唔知發生咩事。
我當然係訂 Hostel 啦! 酒店情況就唔知啦! 初時唸住嚟到當地自然會搵到架啦! 點知嚟到問人至知每到 weekend 經常都會係咁架！重要咁啱有 function 攪，住完星期五個晚咪將所有行李寄存响 Hostel 度囉，好彩 book 左一晚咋如果唔係仲慘呀！
我即時上網搵屋租，唸住可即日住都好ar！就係咁我 send 十幾個 messenger 終於有人覆，唸住下午睇夜晩住啦，點知屋主要五點至得閒，都冇所謂啦咪等下囉，佢叫我去 Bridges Bar 等，我搵來搵去只搵到一間 Bridges Inn 咁地面係 Bar，咪唸住 OK 啦！就係咁我响附近等左3個鐘，重要時不時落雨，响河邊坐坐下又要避雨。幾經辛苦終於到５點，點知等錯地方，最後個屋主 Call 我話趕住返屋企唔等我.... 我頂！！！咁我今晚點算呀！咪拿拿聲逐間 Hostel 問重有冇 Room 行左2間唔對路，飛快走去 Tour information 問，嘩！要EU90兩晚，成９百蚊港紙，係 Hostel 唔係 Hotel 咁點住呀！即時腦海閃出多過唸頭，書店過夜，返機場，去教會，搭夜車，全部都好似唔 work 。最後我就做左個大膽既決定，去網 Bar 過夜！！！
响 Dublin D internet bar，通常九點就收，我只係搵到一間有 24 hr，佢有 offer EU5 play over night 不過要過左 12點，正常時間要 EU3/hr ，離12點重有５個鐘 5x3=15 都好唔化算啫！我己經成日响街度遊來遊去，想搵個地方定下，終於我响附近搵到間收12點，重要如果一次過 paid EU10有10個鐘，咁我就响度玩左5個鐘，一到12點就走去隔離 EU5 play over night 度。其實我都好驚架！一個女仔，重要係中國人！我唸住整晚都唔訓架啦！點知都訓左２個鐘！Internet bar 入面好神奇，門口經常有Ｄ醉酒鬼拍門，不過佢地又唔會入嚟，我幾驚呀！坐係我隔離係個 irish 男人大約3-40歲到，粗線條嗰種，成晚就同一個日本女仔玩 webcam 搵地方住，應該係約左去英國旅行。最最神奇既係我見到個似中東人既男人睇梗香港或大陸既古裝片，因為我離開間 Bar 既時候至睇到，唔知邊套劇。
就係咁我响 Dublin 流落左成日，總算有驚無險啦！不過都唔有第二次 Lu !

Funny Guy

世界就係咁小！
我一定不會見意人搭海灣航空去Dublin!! 飛行時間實太長啦！
由香港去曼谷２個鐘，停機入油打掃上人個機鐘，再飛巴林５個機鐘，轉機又要４個鐘，再飛機都柏林又差不多９個鐘，前前後後大約要20個鐘，都好辛苦架!!! (不過真係平HKD53XX)
我唸住都唔會有香港人搭架啦！架機都好 full，果真大部份都係泰國人呀，巴林人/中東人呀，西人呀咁啦！坐我隔離係個男仔，似華人，染金髮，我初時仲估佢係巴林華人添，因為我聴到佢英文唔係咁好！！
由香港去泰國２個鐘我地都冇講過野！去到泰國D人落曬機佢終於要開口問我可唔可以落機！原來佢都係香港人！重要都係 WHA 去 Ireland !!!!!
嘩！好彩我識左佢咋，下稱 “K” 。
原來 K 攞 WHS 去左澳洲一年 (不過佢D英文唔似囉，死啦！我驚好似佢咁一年後英文仲係咁屎！！)
K 係好攪笑既人，cam cam 地，我覺得佢係 gay 不過佢唔認!經常要去浦bar!! 嚟左咁耐係晚晚都去架，好似唔去唔舒服咁架!!!!!! 佢通常去 gay bar!!!! 佢講D經黁重攪笑，不過唔方便响到講啦!!
K 雖然英文唔好，不過佢勁厚面皮，响街隨手可以捉過人問野，非常直得我學習。咁我地咪一齊上路囉，冇咁驚麻!!!!!
亦由於佢我又識左機個同我地一樣既WHA香港朋友啦!!!
所以Ｋ算係我响 Ireland 既第一個朋友！！

黑色的開始

之前朋友Ｌ先生提過我，不過唸住我仲後生冇可能係我既！

我只不過擺左1年多之麻，這對陪我征戰多年既鞋，就咁就冇左!!!

事綠L先生己經同我講過如果D鞋太耐冇著，鞋D膠好容易就碎!!! 我出門口既時候都唔覺架！點知我一上A12巴士就發現鞋尾有D裂，點知範圍越來越大，我等機既時候仲手多多响鞋頭整一整就好似上圖咁，成塊鞋底甩左出來。
咁死啦，點算好！好彩我帶左2對鞋啫，不過係全部寄左倉，我重要搭廿幾個鐘頭飛機架。最後我幾經辛苦至行左上機，响依依不舍既情況下在 Bathrain 機場轉機時掉左對鞋。只係著住對蔑响機場走來走去直到我响 Dublin 機場蘿番D行李。
就响咁既情況下開始左我預備會去一年既旅程。