終於爆大獲

我啲英文真係好屎，再加上呢度啲口音同英美口音有出入，間接令到我聽錯嘢喇！
事緣上星期一二我應該要响公司留至８點才離開公司，但我唔知頭唔知路，星期一就咁照常5：30就放咗工。因為我聽唔清楚佢地講咩，漏聽咗星期一（佢地讀 moonday）我以為只係星期二要留底！其實我一直都只係識聽我知嘅英文，其他全部都係靠估佢地嘅意思。
咁第二日返到公司未入門口已經見到我兩個上司响門口歡迎我啦！佢地用好嚴勵嘅語氣問我點解走咗人，我咪同佢地講聽漏咗囉！佢地緊係好嬲啦！警告話可能會炒我之頪咁啦！！嘻！其實我都唔係好知佢地講咩！！！
我都諗住今次實被人炒㗎！跟住佢地冇理我，我咪繼續做嘢囉！我嘅直屬上司 J 都重係好嬲，因為我應該同佢一齊留到８點！！
大約11:30到佢地無啦啦叫我去 reception 幫手接電話！真係玩嘢！佢地明知我英文差重叫我接電話，初時我都好驚，過咗一陣心諗炒就炒啦，我一早預咗！就係咁我响 reception 接咗4個鐘頭電話，又無人問，係咁張D電話亂咁飛，其實好好玩！！
到差唔多放工，我上司同我講有咩問題，聽唔清楚要問之類啦，話叫我聽電話係俾機會我練英文！！
其實我上司同中國男同事都好好人，個男同事問過我點解走咗人，我同佢講真係聽唔清楚，因為佢知我英文真係好差，所以佢同我上司講囉！就係咁我又唔駛俾人炒住！！！